काठमाडौं, भदौ १२ । सरकारले फेसबुकसहितका सामाजिक सञ्जाल ७ दिनभित्र दर्ता हुनुपर्ने निर्णय गरेको छ । भदौ ९ गते बसेको मन्त्रिपरिषद बैठकले सामाजिक सञ्जालको प्रयोगलाई व्यवस्थित गर्न कडाइ गर्ने निर्णय गरेको हो ।
सरकारले सर्वोच्च अदालतको आदेशबमोजिम सामाजिक सञ्जाल सात दिनभित्र सञ्चार मन्त्रालयमा सूचीकरण हुनुपर्ने र तोकिएको अवधिमा सूचीकरण नभए नेपालमा निष्क्रिय गराउन नेपाल दूरसञ्चार प्राधिकरणलाई निर्देशन दिने निर्णय गरेको हो।
"सामाजिक सञ्जाल प्रयोग व्यवस्थापन निर्देशिका, २०८०" र सर्वोच्च अदालतको आदेश अनुरूप सामाजिक सञ्जाल सञ्चालकलाई जिम्मेवार तथा जवाफदेही बनाउन सात दिनको म्याद दिई सञ्चार तथा सूचना प्रविधि मन्त्रालयमा सूचीकरणका लागि सार्वजनिक रूपमा आह्वान गर्ने मन्त्रिपरिषदले निर्णय गरेको छ ।
अदालतको आदेश अनुरूप यो निर्णयले सामाजिक सञ्जाल सञ्चालकहरूलाई थप जवाफदेही र जिम्मेवार बनाउने लक्ष्य राखेको छ ।
