कैलाली, असार ८ ।  कैलालीमा आफ्नै देवरले सुत्केरी भाउजुको हत्या गरेको पुष्टि भएको छ । 

कैलालीको गौरीगंगा नगरपालिका–७  कैलाशपुरमा शुक्रबार बिहान मृत भेटिएकी १९ वर्षीय सुत्केरी तुलसी नाथको हत्या भएको आफ्नै कान्छा देवर नविन नाथले गरेको  प्रहरी अनुसन्धानबाट खुलेको हो ।  तुलसीले घटना हुनुभन्दा १६ दिनअघि मात्र सन्तान जन्माएकी थिइन्।

प्रहरीका अनुसार नविनले तुलसी सुतिरहेको अवस्थामा तकियाले मुख थुनेर हत्या गरेको र उनको कानको झुम्का चोरी गरेको बयान दिएका छन् ।

त्यसपछि उनले प्रमाण नष्ट गर्ने उद्देश्यले शवलाई नजिकैको नालामा फालेका थिए । सुरुमा शवमा कुनै चोटपटक नदेखिएकोले हत्या भएको शंका नलागेपनि सुनका गहना हराएको देखिएपछि हत्याको आशंका गरिएको थियो ।