ताइवान, चैत २१ । ताइवानको पूर्वी तटीय क्षेत्रमा बुधबार ७.४ म्याग्निच्युडको शक्तिशाली भूकम्प गएको छ। भूकम्पका कारण सहरका धेरै भागमा बिजुली अवरुद्ध भएको छ र दक्षिणी जापान र फिलिपिन्सका टापुहरूमा सुनामीको चेतावनी जारी गरिएको छ। पूर्वी ताइवानमा धेरै भवनहरू भत्किएका छन्।

ताइवानको केन्द्रीय मौसम विज्ञान प्रशासनले भूकम्पको केन्द्रबिन्दु ताइवान टापुको पूर्वी तटमा रहेको पूर्वी काउन्टी हुआलियनको तटमा रहेको बताएको छ। जापानले ओकिनावाको दक्षिणी प्रिफेक्चरको तटीय क्षेत्रका लागि निकासी सल्लाह जारी गरेको छ। जापानको मौसम विज्ञान एजेन्सीका अनुसार सुनामीका छालहरू जापानको दक्षिण-पश्चिमी तटीय क्षेत्रसम्म पुग्ने अनुमान गरिएको छ।

अमेरिकी भूगर्भ सर्वेक्षण (युएसजीएस) का अनुसार भूकम्पको तीव्रता यति धेरै थियो कि यसले जापानका दक्षिणी टापुहरूलाई हल्लाएको थियो । भूकम्पपछि ताइवानमा ठूलो विनाश देखिएको छ र धेरै भवनहरू ध्वस्त भएका छन् भने धेरैमा ठूलो क्षति पुगेको छ । भूकम्पपछि मानिसहरु घरभित्रै फसेका छन्, उनीहरुको उद्दारका लागि राहत तथा उद्धारको काम भइरहेको छ ।

जापान मौसम विज्ञान एजेन्सी (जेएमए) ले सुनामीको चेतावनी जारी गर्दै मानिसहरूलाई समुद्रबाट टाढा रहन सल्लाह दिएको छ।