काठमाडौं, असार ११ । विशेष अदालत काठमाडौंमा पूर्वप्रधानमन्त्री तथा नेकपा एर्कीकृत समाजवादीका अध्यक्ष माधव कुमार नेपालको बयान सकिएको छ । 

न्यायाधीशहरू तेजनारायण सिंह राई, रामबहादुर थापा र विदुर कोइरालाको इजलासमा नेपालको बयान सकिएको हो । अब केही बेरमा थुनछेक बहस सुरू हुनेछ ।

नेपालको तर्फबाट बहसका लागि वरिष्ठ अधिवक्ता शम्भु थापा, गोपाकृष्ण घिमिरे, गोविन्द बन्दी लगायत १२० जनाले नाम टिपाएका छन् । थुनछेक बहस पछि पुर्पक्षका लागि नेपाललाई  कारागार पठाउने कि बाहिरबाटै मुद्दा लड्न पाउने आदेश  हुनेछ । थुनछेक बहस लम्बिएमा आज नेपाल न्यायिक हिरासतमा बस्नुपर्ने हुनसक्ने भएकाले नेपालको तर्फबाट केही कानुन व्यवसायीले मात्रै बहस गर्ने बताइएको छ ।

 पतञ्जलि जग्गा हिनामिना प्रकरणमा अख्तियार दुरुपयोग अनुसन्धान आयोगले दायर गरेको मुद्दाका क्रममा उनी अदालतमा आफैँ हाजिर हुन गएका थिए ।