टेक्सास, असार २२ । अमेरिकाको टेक्सास राज्यमा हालैको भारी वर्षापछि आएको बाढीले ठूलो जनधनको क्षति पुर्‍याएको छ।

ताजा जानकारीअनुसार बाढीबाट कम्तीमा ४३ जनाको मृत्यु भएको पुष्टि गरिएको छ, जसमा १५ बालबालिका पनि परेका छन्। साथै ८५० भन्दा बढी व्यक्तिहरूलाई उद्धार गरी सुरक्षित स्थानमा सारिएको छ।  ३७ जना अझै बेपत्ता छन् । 

यो बाढी राज्यको इतिहासमै सबैभन्दा विनाशकारी बाढीमध्ये एक मानिएको छ। सीएनएनले जनाएअनुसार शुक्रबार बिहानदेखि सुरु भएको मुसलधारे वर्षापछि ग्वाडालुपे नदी आसपासका क्षेत्रमा भयावह बाढी आएको हो।

सडक, पुल, र आवासीय क्षेत्रहरू डुबानमा परेका छन्। धेरै स्थानमा विद्युत् आपूर्ति अवरुद्ध भएको छ र संचार सम्पर्क समेत टुटेको छ। आपतकालीन सेवाहरू पूर्ण रूपमा सक्रिय अवस्थामा छन्, तर बाढीको तीव्रताका कारण उद्धारकार्य चुनौतीपूर्ण बनेको छ।

राज्य सरकारद्वारा प्रभावित क्षेत्रमा आपतकालीन अवस्था घोषणा गरिएको छ र संघीय सरकारसँग सहयोग मागिएको छ। टेक्सासका गभर्नरले जनतालाई सतर्क रहन र आवश्यक नपरी बाहिर ननिस्कन आग्रह गरेका छन्।

बाढीको प्रमुख कारण निरन्तर परेको मूसलधारे वर्षा, नदीको पानीको सतह असामान्य रूपमा बढ्नु, र जल निकासीको कमजोरी रहेको जनाइएको छ। मौसम विज्ञहरूले आगामी दिनहरूमा अझै वर्षा हुन सक्ने चेतावनी दिएका छन्, जसले स्थिति थप जटिल बनाउन सक्छ।

स्थानीय बासिन्दाहरूलाई सुरक्षित स्थानमा जान, पिउने पानीको सतर्कता अपनाउन, र सरकारी सूचना पालना गर्न अनुरोध गरिएको छ। राहत र पुनःस्थापना कार्यमा धेरै स्वयंसेवी संस्था तथा राष्ट्रिय गार्डसमेत परिचालित छन्।