काठमाडौं, कात्तिक १ । जेनजी अभियन्ता मिराज ढुंगानाले घोषणा गरिएको नयाँ राजनीतिक दलले नेपालले प्रत्यक्ष निर्वाचित कार्यकारी प्रणाली अपनाउने र विदेशमा बस्ने नेपालीहरूलाई मतदानको अधिकार प्रदान नगरेसम्म कुनै पनि चुनावमा भाग नलिने घोषणा गरेका छन् ।

शनिबार काठमाडौंको एभरेस्ट होटलमा आयोजित पार्टी घोषणा कार्यक्रममा बोल्दै ढुंगानाले आफ्नो समूहको बटमलाइन नै प्रत्यक्ष निर्वाचित कार्यकारी रहेकाले तत्कालीन अवस्थामा निर्वाचनमा सहभागी नहुने बताएका हुन् ।

उनले आफ्नो पार्टीको गठन चुनावी महत्वाकांक्षाबाट प्रेरित नभई व्यवस्थित राजनीतिक सुधारको प्रतिबद्धताबाट प्रेरित भएको बताए। उनले जेनजी अभियन्ताहरूलाई एकजुट बनाएर संगठित रूपमा अगाडि बढ्नका लागि नयाँ दल खोल्न लागिएको स्पष्ट पारेका छन् । 

“हाम्रो मुख्य एजेन्डा भनेको प्रत्यक्ष निर्वाचित कार्यकारी र विदेशमा रहेका नेपालीहरूको मतदानको अधिकार सुनिश्चित गर्नु हो। यी दुई सर्तहरू बिना, हामी चुनावमा भाग लिने छैनौं,” ढुङ्गानाले भने।