पर्सा, भदौ २६ । पर्सामा एक चौधरी दम्पतीले १० वर्षपछि एकैपटक ३ वटा बच्चा जन्माएका छन् । प्रभु हस्पिटलमा उपचाररत पर्सा जिल्लाको पर्सागढी नगरपालिका वडा नं. ९ का बृज चौधरी थारु र ललिता देवी थरुनी दम्पतीले एकैपटक ३ वटा छोरा जन्माएकी हुन् ।
१० वर्षदेखि विभिन्न अस्पताल चहार्दा चहार्दै उपचार नभएपछि आईभिएफ प्रविधि अपनाएर गर्भ बसेको थियो । आर्थिक अवस्था कमजोर भएका थरुनीलाई प्रभु हस्पिटलकै स्त्री तथा प्रसूति रोग विशेषज्ञ डा. लक्ष्मी थापाको टिमले शल्यक्रिया गरेर तीनवटै बच्चा पाउन सफल भएको हो ।
निकै जोखिम मानिएको अप्रेसनमा प्रभु हस्पिटलका एनेस्थेसियाका डा. सन्देश यादव, शिशु तथा बाल रोग विशेषज्ञ डा. नविन झा, नर्स स्टाफ, रमिता गिरी, अनिल पटेल, मेनुका घिमिरे, पचिया खातुन, कृष्णा ठाकुर लगायतको सहयोगमा सफल भएको थियो ।
व्यथा लागेपछि विभिन्न अस्पतालमा लग्दा अन्यत्र लैजान सल्लाह दिएपनि प्रभु हस्पिटलले जोखिम मोलेर शल्यक्रिया गरेका हुन् । हाल आमा तथा तीनवटै बच्चा सकुसल रहेका छन् ।
