काठमाडौं, वैशाख २१ । हेटौँडामा जमिनमुनि भासिएको बोलेरो गाडी अझै पनि बेपत्ता छ । शुक्रबार हेटौँडा उपमहानगरपालिका गैरी गाउँस्थित सडकमा रोकिर राखिएको ना ४ च ४८३३ बोलेरो गाडी अचानक जमिनमुनि भासिएर बेपत्ता भएको थियो ।
बोलेरो गाडी ५ सेकेण्डमै जमिनमुनि भासिएर हराएको प्रत्यक्षदर्शीहरुले बताएका छन् । मोटर लगाएर पानी फाल्दा पनी भासिएको बोलेरो गाडी अहिलेसम्म भेटिएको छैन । गाडीका चालक र सहचालकले भने गाडी भासिनुअघि नै निस्किएर जोगिएकाे बताइएकाे छ ।
हाल गाडी भासिएको सडकमै पानीको दह बनेको छ । तर गाडी कहाँ पुग्यो पत्तो लागेको छैन । जमिनमुनि पानीको बहाव वा माछापालनका लागि भनेर खनेको नजिकै रहेको बोरिङले पानीको सतहसँगै बालुवा पनि तानेका कारण सतह कमजोर भई धसिएको हुन सक्ने प्रहरीको अनुमान छ ।
हाल पानीलाई निकास दिएर गाडीको खोजी कार्य भइरहेको प्रहरीले जानकारी दिएको छ ।
