काठमाडौं, कार्तिक ९ । न्यायाधीश समाज नेपालले सर्वोच्च अदालतका प्रधानन्यायाधीशलाई लिएर देखिएको विवाद छिटो समाधान गर्नुपर्ने बताइएको छ । न्यापालिका उपर निष्पक्षताको कुरामा प्रश्न खडा हुनु र भागबण्डाको आरोप लागेका समाचार, दृष्टिकोण, टिकाटिप्पणी आदि सामाजिक सन्जाल र आम सञ्चार मार्फत् सार्वजनिक हुनु दुःखद विषय भएको भन्दै यसलाई समाधान गर्नु पर्ने न्यायाधीश समाजका उपाध्यक्ष बाबुराम रेग्मीले बताउनु भएको छ ।

उपाध्यक्ष रेग्मीले सोमबार जारी गरिएको विज्ञप्तिमा भनिएको छ, ‘न्यापालिका उपर निष्पक्षताको कुरामा प्रश्न खडा हुनु र भागबण्डाको आरोप लागेका समाचार, दृष्टिकोण, टिकाटिप्पणी आदि सामाजिक सन्जाल र आम सञ्चार मार्फत् सार्वजनिक हुनु दुःखद विषय हो । यस्ता कुरामा संवेदनशील र गम्भीर हुनुपर्दछ । वास्तविकता के हो भन्ने कुरा छानविन पश्चात एकीन हुन सक्दछ ।’

सार्वजनिक रुपमा उठाइएका प्रश्नहरु सत्य–तथ्यमा आधारित छन् भने त्यसलाई गम्भीर र आपत्तीजनक कार्य मान्नुपर्ने भन्दै विज्ञप्तिमा लेखिएको छ, ‘यस्ता कुराहरुलाई लामो समयसम्म कुनै निकास नदिई त्यत्तिकै राख्दा न्यायपालिकालाई थप क्षति पुग्न सक्ने हुँदा यस्ता कुराको समयमा नै समाधान खोजिनुपर्छ ।’